har-chand ki dekhe hai wo pyar ki aankhon se

har-chand ki dekhe hai vo pyaar kī āñkhoñ se

par nikle hai be-rangī us paar kī āñkhoñ se

shiddat se lagā hañsne ahvāl pe gar mere

aañsū bhī kabhī Tapke makkār kī āñkhoñ se

be-tāqatī-e-dil kā kyā sharh-o-bayāñ kījiye

bīmārī numāyāñ hai bīmār kī āñkhoñ se

hai teġh-e-nigah khīñche shamshīr-ba-kaf mizhgāñ

ab jiite nahīñ bachte ḳhūñ-ḳhār kī āñkhoñ se

lākhoñ hī kī āñkhoñ se āñkhoñ tirī behtar haiñ

kyā achchhī haiñ ai pyāse vo chaar kī āñkhoñ se

mat ahl-e-diloñ se kar ham-chashmī ai ā.īne

ġhāfil na milā āñkheñ bedār kī āñkhoñ se

har tarah se dekhā hai vo dekh hī letā hai

tayyārī kare kyā koī 'ayyār kī āñkhoñ se

itnī bhī rasā.ī ho 'joshish' to ġhanīmat hai

ḳhāk-e-kaf-e-pā maliye dil-dār kī āñkhoñ se

har-chand ki dekhe hai wo pyar ki aankhon se

par nikle hai be-rangi us par ki aankhon se

shiddat se laga hansne ahwal pe gar mere

aansu bhi kabhi Tapke makkar ki aankhon se

be-taqati-e-dil ka kya sharh-o-bayan kijiye

bimari numayan hai bimar ki aankhon se

hai tegh-e-nigah khinche shamshir-ba-kaf mizhgan

ab jite nahin bachte KHun-KHar ki aankhon se

lakhon hi ki aankhon se aankhon teri behtar hain

kya achchhi hain ai pyase wo chaar ki aankhon se

mat ahl-e-dilon se kar ham-chashmi ai aaine

ghafil na mila aankhen bedar ki aankhon se

har tarah se dekha hai wo dekh hi leta hai

tayyari kare kya koi 'ayyar ki aankhon se

itni bhi rasai ho 'joshish' to ghanimat hai

KHak-e-kaf-e-pa maliye dil-dar ki aankhon se