har-chand mera shauq-e-safar yun na rahega

har-chand mirā shauq-e-safar yuuñ na rahegā

kyā ḳhaar sar-e-rāhguzar yuuñ na rahegā

mumkin hai tirī yaad sulagtī rahe tā-umr

ye sho.ala sharar-bār magar yuuñ na rahegā

is dhuup meñ merī bhī jhulas jā.eñgī āñkheñ

terā bhī ruḳh-e-ġhuncha-e-tar yuuñ na rahegā

mauqa hai gul-o-barg sajā lo sar-e-mizhgāñ

har fasl meñ sarsabz shajar yuuñ na rahegā

kuchh sher raqam karte chalo lauh-e-junūñ par

har daur meñ ye kār-e-hunar yuuñ na rahegā

kuchh log mire ba.ad bhī rah jā.eñge lekin

sahrā meñ koī ḳhāk-ba-sar yuuñ na rahegā

ḳhush aa.e 'salīm' aaj use merī asīrī

kal tak magar afsūñ kā asar yuuñ na rahegā

har-chand mera shauq-e-safar yun na rahega

kya KHar sar-e-rahguzar yun na rahega

mumkin hai teri yaad sulagti rahe ta-umr

ye shoala sharar-bar magar yun na rahega

is dhup mein meri bhi jhulas jaengi aankhen

tera bhi ruKH-e-ghuncha-e-tar yun na rahega

mauqa hai gul-o-barg saja lo sar-e-mizhgan

har fasl mein sarsabz shajar yun na rahega

kuchh sher raqam karte chalo lauh-e-junun par

har daur mein ye kar-e-hunar yun na rahega

kuchh log mere baad bhi rah jaenge lekin

sahra mein koi KHak-ba-sar yun na rahega

KHush aae 'salim' aaj use meri asiri

kal tak magar afsun ka asar yun na rahega