har chand rahguzar thi dushwar qafiye ki

har chand rahguzar thī dushvār qāfiye kī

sun kar na rah sake ham lalkār qāfiye kī

din kā sukūn ġhārat rātoñ kī niiñd ġhā.eb

sar par laTak rahī hai talvār qāfiye kī

ham is ko bāñdhte kyā jakḌā hai is ne ham ko

ab dekhte haiñ sūrat nā-chār qāfiye kī

is aas par ki shāyad ho jaa.e tañg ham par

karte rahe ḳhushāmad aġhyār qāfiye kī

taaza havā chalī aur ik lahar dil meñ uTThī

roke na ruk sakī phir yalġhār qāfiye kī

paayā surāġh-e-mazmūñ gaahe radīf meñ bhī

lāzim na thī samājat har baar qāfiye kī

dasht-e-ḳhayāl meñ phir kyā kyā khule manāzir

kuchh der ko haTī thī dīvār qāfiye kī

jab sher kā safīna bahr-e-ġhazal meñ Dolā

us vaqt kaam aa.ī patvār qāfiye kī

maġhrib kī ho kahānī yā mashriqī rivāyat

ūñchī rahī hamesha dastār qāfiye kī

kuchh sher kaam ke bhī is meñ nikāle ham ne

vo kahte the zamīñ hai be-kār qāfiye kī

phir aur koī naġhma bhaa.e na us ko 'bāsir'

jo ek baar sun le jhankār qāfiye kī

har chand rahguzar thi dushwar qafiye ki

sun kar na rah sake hum lalkar qafiye ki

din ka sukun ghaarat raaton ki nind ghaeb

sar par laTak rahi hai talwar qafiye ki

hum is ko bandhte kya jakDa hai is ne hum ko

ab dekhte hain surat na-chaar qafiye ki

is aas par ki shayad ho jae tang hum par

karte rahe KHushamad aghyar qafiye ki

taza hawa chali aur ek lahar dil mein uTThi

roke na ruk saki phir yalghaar qafiye ki

paya suragh-e-mazmun gahe radif mein bhi

lazim na thi samajat har bar qafiye ki

dasht-e-KHayal mein phir kya kya khule manazir

kuchh der ko haTi thi diwar qafiye ki

jab sher ka safina bahr-e-ghazal mein Dola

us waqt kaam aai patwar qafiye ki

maghrib ki ho kahani ya mashriqi riwayat

unchi rahi hamesha dastar qafiye ki

kuchh sher kaam ke bhi is mein nikale hum ne

wo kahte the zamin hai be-kar qafiye ki

phir aur koi naghma bhae na us ko 'basir'

jo ek bar sun le jhankar qafiye ki