har chand sine mein dil-e-kufr-ashna nahin

har chand siine meñ dil-e-kufr-āshnā nahīñ

maiñ us ko pūjtā huuñ jo merā ḳhudā nahīñ

vo merī zindagī hai magar zindagī kī tarah

mujh se ḳhafā nahīñ hai ki vo bevafā nahīñ

kyā kyā na apne saath zamānoñ ko laa.ī hai

vo ik nigāh jis se koī āshnā nahīñ

shāyad maiñ ḳhāk-dāñ ke dhueñ kī lakīr huuñ

vo mujh ko dekhtā hai magar pūchhtā nahīñ

guuñj us kī aaj bhī mire ḳhalvat-kade meñ hai

vo naġhma jis ko tū ne dobāra sunā nahīñ

un rāstoñ kī gard mirī zindagī pe hai

jin rāstoñ pe maiñ kabhī 'aḳhtar' chalā nahīñ

har chand sine mein dil-e-kufr-ashna nahin

main us ko pujta hun jo mera KHuda nahin

wo meri zindagi hai magar zindagi ki tarah

mujh se KHafa nahin hai ki wo bewafa nahin

kya kya na apne sath zamanon ko lai hai

wo ek nigah jis se koi aashna nahin

shayad main KHak-dan ke dhuen ki lakir hun

wo mujh ko dekhta hai magar puchhta nahin

gunj us ki aaj bhi mere KHalwat-kade mein hai

wo naghma jis ko tu ne dobara suna nahin

un raston ki gard meri zindagi pe hai

jin raston pe main kabhi 'aKHtar' chala nahin