har chiz ke sine mein koi bol raha hai

har chiiz ke siine meñ koī bol rahā hai

ḳhāmoshī-e-asrār bhī taqrīr-numā hai

jaulānī-e-afkār hai matlūb-e-gulistāñ

ye mauj-e-sabā bhī kisī ġhunche kī sadā hai

hai tere tabassum meñ nihāñ barq-e-nihāñ-soz

sau baar mire hāthoñ tirā parda uThā hai

gir kar bhī hai dil auj-e-surayyā ke barābar

kyā jāniye ye kaun sī rif.at se girā hai

duniyā ke liye maiñ kabhī uljhā huuñ ḳhudā se

ye dahr kabhī mere hī hāthoñ se jilā hai

maanā ki bahut talḳh the suqrāt ke auqāt

maiñ ne bhī to hālāt kā zahrāb piyā hai

ai mere tasavvur mirī āñkhoñ pe ayaañ ho

maiñ ġhair nahīñ kis liye tū mujh se chhupā hai

is khusravī māhaul meñ dil vāloñ se kah do

yaañ shīrīñ ne farhād kā kab saath diyā hai

ham donoñ mulāqāt ke tālib to haiñ lekin

maiñ paikar-e-ḳhushbū huuñ vo gul-barg-e-hayā hai

dekho to karishma hai Thikānoñ kā badalnā

hai ruḳh pe tumhāre to mire dil meñ ḳhudā hai

zar tere liye hai na ki tū zar ke liye hai

ye zar kī ġhulāmī havas-e-zar kī sazā hai

gardish ne zamāne kī judā kar diyā mujh ko

us khet se jis se ye mirā jism ugā hai

jo ashk ki girtā thā mirī maañ kī lahad par

vo ashk mirī aañkh meñ barsoñ se rukā hai

har chiz ke sine mein koi bol raha hai

KHamoshi-e-asrar bhi taqrir-numa hai

jaulani-e-afkar hai matlub-e-gulistan

ye mauj-e-saba bhi kisi ghunche ki sada hai

hai tere tabassum mein nihan barq-e-nihan-soz

sau bar mere hathon tera parda uTha hai

gir kar bhi hai dil auj-e-surayya ke barabar

kya jaaniye ye kaun si rifat se gira hai

duniya ke liye main kabhi uljha hun KHuda se

ye dahr kabhi mere hi hathon se jila hai

mana ki bahut talKH the suqraat ke auqat

main ne bhi to haalat ka zahrab piya hai

ai mere tasawwur meri aankhon pe ayan ho

main ghair nahin kis liye tu mujh se chhupa hai

is khusrawi mahaul mein dil walon se kah do

yan shirin ne farhad ka kab sath diya hai

hum donon mulaqat ke talib to hain lekin

main paikar-e-KHushbu hun wo gul-barg-e-haya hai

dekho to karishma hai Thikanon ka badalna

hai ruKH pe tumhaare to mere dil mein KHuda hai

zar tere liye hai na ki tu zar ke liye hai

ye zar ki ghulami hawas-e-zar ki saza hai

gardish ne zamane ki juda kar diya mujh ko

us khet se jis se ye mera jism uga hai

jo ashk ki girta tha meri man ki lahad par

wo ashk meri aankh mein barson se ruka hai