har dam aate hain bhare dida-e-giryan tujh bin

har dam aate haiñ bhare dīda-e-giryāñ tujh bin

mujh ko ye Dar hai ki laa.eñ na ye tūfāñ tujh bin

lāla-o-gul kī taraf kis kī balā dekhe hai

jī ko bhātī hī nahīñ sair-e-gulistāñ tujh bin

aa gayā bas-ki ḳhalal maz.hab-o-millat meñ mirī

na rahā gabr meñ pyāre na musalmāñ tujh bin

dil gayā diin gayā sabr gayā taab ga.ī

yuuñ hī apne to hue saikḌoñ nuqsāñ tujh bin

na khile ġhuncha-e-tasvīr ke mānind kabhū

lab-e-ḳhāmosh mire ai gul-e-ḳhandāñ tujh bin

jab se ai gul tū gayā bistar-e-āshiq pe tire

gul-e-bālīñ na hue sumbul-o-raihāñ tujh bin

sāmne se mirī āñkhoñ ke na jā maan kahā

kis ko dekhūñgā maiñ phir ai mah-e-tābāñ tujh bin

roz dushman kā bhī is tarah na kaTiyo yā-rab

maiñ ne jis zulm se kaaTī shab-e-hijrāñ tujh bin

mah-e-nau shaam ke hote hī tasavvur meñ tire

thā khaḌā sar pe liye ḳhanjar-e-uryāñ tujh bin

aur jo jaatī thī kabhī ḳhosha-e-parvīñ pe nigāh

vo bhī lagtā thā sanam dasta-e-paikāñ tujh bin

'mus.hafī' jā ke gulistāñ meñ kare kyā pyāre

ki gulistāñ hai use ḳhāna-e-zindāñ tujh bin

har dam aate hain bhare dida-e-giryan tujh bin

mujh ko ye Dar hai ki laen na ye tufan tujh bin

lala-o-gul ki taraf kis ki bala dekhe hai

ji ko bhati hi nahin sair-e-gulistan tujh bin

aa gaya bas-ki KHalal mazhab-o-millat mein meri

na raha gabr mein pyare na musalman tujh bin

dil gaya din gaya sabr gaya tab gai

yun hi apne to hue saikDon nuqsan tujh bin

na khile ghuncha-e-taswir ke manind kabhu

lab-e-KHamosh mere ai gul-e-KHandan tujh bin

jab se ai gul tu gaya bistar-e-ashiq pe tere

gul-e-baalin na hue sumbul-o-raihan tujh bin

samne se meri aankhon ke na ja man kaha

kis ko dekhunga main phir ai mah-e-taban tujh bin

roz dushman ka bhi is tarah na kaTiyo ya-rab

main ne jis zulm se kaTi shab-e-hijran tujh bin

mah-e-nau sham ke hote hi tasawwur mein tere

tha khaDa sar pe liye KHanjar-e-uryan tujh bin

aur jo jati thi kabhi KHosha-e-parwin pe nigah

wo bhi lagta tha sanam dasta-e-paikan tujh bin

'mushafi' ja ke gulistan mein kare kya pyare

ki gulistan hai use KHana-e-zindan tujh bin