har dam shagufta-tar jo hansi mein dahan hua

har dam shagufta-tar jo hañsī meñ dahan huā

ġhunche se pahle gul huā gul se chaman huā

zāhid huā asaam huā barhaman huā

is rah meñ rahnumā jo banā rāhzan huā

sūrat badal ga.ī koī pahchāntā nahīñ

'āshiq tirā vatan meñ ġharīb-ul-vatan huā

qad sarv nargis aañkh dahan ġhuncha gul ezaar

jalve se us ke ḳhāna-e-vīrāñ chaman huā

ġhairoñ ne baiThne na diyā jab kahīñ mujhe

maiñ anjuman meñ muntazim-e-anjuman huā

tab-e-jafā-shi.ār kī tafrīh ke liye

naala mirā tarāna-e-murġh-e-chaman huā

'mushtāq' sūfiyoñ meñ to taa.ib huā thā kal

suntā huuñ aaj rindoñ meñ tauba-shikan huā

har dam shagufta-tar jo hansi mein dahan hua

ghunche se pahle gul hua gul se chaman hua

zahid hua asam hua barhaman hua

is rah mein rahnuma jo bana rahzan hua

surat badal gai koi pahchanta nahin

'ashiq tera watan mein gharib-ul-watan hua

qad sarw nargis aankh dahan ghuncha gul ezar

jalwe se us ke KHana-e-viran chaman hua

ghairon ne baiThne na diya jab kahin mujhe

main anjuman mein muntazim-e-anjuman hua

tab-e-jafa-shiar ki tafrih ke liye

nala mera tarana-e-murgh-e-chaman hua

'mushtaq' sufiyon mein to taib hua tha kal

sunta hun aaj rindon mein tauba-shikan hua