har dar-o-diwar pe larzan koi paikar lage

har dar-o-dīvār pe larzāñ koī paikar lage

kitnī shakloñ kā parī-ḳhāna hamārā ghar lage

dauḌtī jaa.eñ ragoñ meñ nīl-gūñ ḳhāmoshiyāñ

duur tak phailā huā yuuñ dhund kā manzar lage

band kamre meñ balā-e-jāñ hai ehsās-e-sukūt

aur bāhar har taraf āvāz kā patthar lage

jaise jaise TūTtā jaa.e nigāhoñ kā bharam

shaḳhsiyat apnī bhī apne-āp ko kam-tar lage

kaañp jaatā hai sadā-e-dil se sahrā-e-sukūt

aur apne paañv kī aahaT se bhī ab Dar lage

ek be-ma.anī tajassus ek be-ma.anī ḳhalish

ek sho.ala sā lapaktā jism meñ aksar lage

har dar-o-diwar pe larzan koi paikar lage

kitni shaklon ka pari-KHana hamara ghar lage

dauDti jaen ragon mein nil-gun KHamoshiyan

dur tak phaila hua yun dhund ka manzar lage

band kamre mein bala-e-jaan hai ehsas-e-sukut

aur bahar har taraf aawaz ka patthar lage

jaise jaise TuTta jae nigahon ka bharam

shaKHsiyat apni bhi apne-ap ko kam-tar lage

kanp jata hai sada-e-dil se sahra-e-sukut

aur apne panw ki aahaT se bhi ab Dar lage

ek be-mani tajassus ek be-mani KHalish

ek shoala sa lapakta jism mein aksar lage