har daur-e-taghayyur ki zaban hota rahega

har daur-e-taġhayyur kī zabāñ hotā rahegā

har tarz-e-bayāñ nazr-e-ḳhizāñ hotā rahegā

tā-hashr do ḳheme yahāñ ābād raheñge

aur saath ujāle ke dhuāñ hotā rahegā

hal-min kī sadā kānoñ se Takrātī rahegī

mahfil meñ bhī maqtal kā gumāñ hotā rahegā

ik yaad sar-e-shām safar kartī rahegī

aur qarya-e-jāñ kū-e-butāñ hotā rahegā

āñkhoñ se furāt-e-ġham-e-dil bahtī rahegī

nā-gufta hai jo kuchh vo bayāñ hotā rahegā

chhū chhū ke badan terā havā aatī rahegī

majzūb tirā raqs-kunāñ hotā rahegā

in taaza charāġhoñ meñ tasādum na rukegā

aur mere ujāloñ kā ziyāñ hotā rahegā

sūraj kī shuā.eñ pas-e-shab Dhaltī raheñgī

jo jo hai nihāñ vo vo ayaañ hotā rahegā

ye baat musallam hai 'safar' gardan-e-haq par

ik ḳhanjar-e-bedād ravāñ hotā rahegā

har daur-e-taghayyur ki zaban hota rahega

har tarz-e-bayan nazr-e-KHizan hota rahega

ta-hashr do KHeme yahan aabaad rahenge

aur sath ujale ke dhuan hota rahega

hal-min ki sada kanon se Takraati rahegi

mahfil mein bhi maqtal ka guman hota rahega

ek yaad sar-e-sham safar karti rahegi

aur qarya-e-jaan ku-e-butan hota rahega

aankhon se furaat-e-gham-e-dil bahti rahegi

na-gufta hai jo kuchh wo bayan hota rahega

chhu chhu ke badan tera hawa aati rahegi

majzub tera raqs-kunan hota rahega

in taza charaghon mein tasadum na rukega

aur mere ujalon ka ziyan hota rahega

suraj ki shuaen pas-e-shab Dhalti rahengi

jo jo hai nihan wo wo ayan hota rahega

ye baat musallam hai 'safar' gardan-e-haq par

ek KHanjar-e-bedad rawan hota rahega