ہر دور تغیر کی زباں ہوتا رہے گا

ہر دور تغیر کی زباں ہوتا رہے گا

ہر طرز بیاں نذر خزاں ہوتا رہے گا

تا حشر دو خیمے یہاں آباد رہیں گے

اور ساتھ اجالے کے دھواں ہوتا رہے گا

ہل من کی صدا کانوں سے ٹکراتی رہے گی

محفل میں بھی مقتل کا گماں ہوتا رہے گا

اک یاد سر شام سفر کرتی رہے گی

اور قریۂ جاں کوئے بتاں ہوتا رہے گا

آنکھوں سے فرات غم دل بہتی رہے گی

نا گفتہ ہے جو کچھ وہ بیاں ہوتا رہے گا

چھو چھو کے بدن تیرا ہوا آتی رہے گی

مجذوب ترا رقص کناں ہوتا رہے گا

ان تازہ چراغوں میں تصادم نہ رکے گا

اور میرے اجالوں کا زیاں ہوتا رہے گا

سورج کی شعاعیں پس شب ڈھلتی رہیں گی

جو جو ہے نہاں وہ وہ عیاں ہوتا رہے گا

یہ بات مسلم ہے سفرؔ گردن حق پر

اک خنجر بیداد رواں ہوتا رہے گا