har dil ke muqaddar mein mohabbat nahin hoti

har dil ke muqaddar meñ mohabbat nahīñ hotī

har shaḳhs ke hisse meñ ye ne'mat nahīñ hotī

mil jaa.e mohabbat kā jab ai dost sahārā

phir aur sahāre kī zarūrat nahīñ hotī

us din mujhe lagtā hai koī paap huā hai

jis din tire kūche kī ziyārat nahīñ hotī

karte haiñ gila tum se tumheñ apnā samajh ke

ġhairoñ se to ai dost shikāyat nahīñ hotī

jalnā hai patange to tū jal soz-e-jigar se

'āshiq ko to ātish kī zarūrat nahīñ hotī

kis darja hai masrūf na.e daur kā insāñ

ḳhud se bhī ise milne kī fursat nahīñ hotī

bin tere karūñ ziist meñ tauba mirī tauba

mujh se to mirī jaan ye jur.at nahīñ hotī

kuchh kaam nahīñ aatī hai mehnat bhī bashar kī

jab tak mire maulā tirī rahmat nahīñ hotī

mehnat se kamā ke tū 'sadā' apnī guzar kar

jo muft mile us meñ to barakat nahīñ hotī

har dil ke muqaddar mein mohabbat nahin hoti

har shaKHs ke hisse mein ye ne'mat nahin hoti

mil jae mohabbat ka jab ai dost sahaara

phir aur sahaare ki zarurat nahin hoti

us din mujhe lagta hai koi pap hua hai

jis din tere kuche ki ziyarat nahin hoti

karte hain gila tum se tumhein apna samajh ke

ghairon se to ai dost shikayat nahin hoti

jalna hai patange to tu jal soz-e-jigar se

'ashiq ko to aatish ki zarurat nahin hoti

kis darja hai masruf nae daur ka insan

KHud se bhi ise milne ki fursat nahin hoti

bin tere karun zist mein tauba meri tauba

mujh se to meri jaan ye jurat nahin hoti

kuchh kaam nahin aati hai mehnat bhi bashar ki

jab tak mere maula teri rahmat nahin hoti

mehnat se kama ke tu 'sada' apni guzar kar

jo muft mile us mein to barakat nahin hoti