har dil kisi ki chah mein dard-ashna mila

har dil kisī kī chaah meñ dard-āshnā milā

har dil meñ ik charāġh-e-tamannā jalā milā

rāheñ milīñ nuqūsh mile rahnumā milā

manzil na mil sakī to musāfir ko kyā milā

kyoñ baḳht-e-nā-rasā kī shikāyat kareñ 'abas

ham ko bhī jo hamāre muqaddar meñ thā milā

zahr-e-ġham-e-hayāt gavārā thā kab magar

ye silsila bhī terī tamanna se jā milā

baaqī rahī kashākash-e-girdāb-o-bahr-e-ġham

kashtī ko nāḳhudā kā sahārā burā milā

apne se log ham ko zamīñ par na mil sake

koī ḳhudā milā to koī nāḳhudā milā

'afzal' dayār-e-ġhair meñ bhaTke tamām raat

koī diyā jalā na koī dar khulā milā

har dil kisi ki chah mein dard-ashna mila

har dil mein ek charagh-e-tamanna jala mila

rahen milin nuqush mile rahnuma mila

manzil na mil saki to musafir ko kya mila

kyon baKHt-e-na-rasa ki shikayat karen 'abas

hum ko bhi jo hamare muqaddar mein tha mila

zahr-e-gham-e-hayat gawara tha kab magar

ye silsila bhi teri tamanna se ja mila

baqi rahi kashakash-e-girdab-o-bahr-e-gham

kashti ko naKHuda ka sahaara bura mila

apne se log hum ko zamin par na mil sake

koi KHuda mila to koi naKHuda mila

'afzal' dayar-e-ghair mein bhaTke tamam raat

koi diya jala na koi dar khula mila