ہر دل کسی کی چاہ میں درد آشنا ملا

ہر دل کسی کی چاہ میں درد آشنا ملا

ہر دل میں اک چراغ تمنا جلا ملا

راہیں ملیں نقوش ملے رہنما ملا

منزل نہ مل سکی تو مسافر کو کیا ملا

کیوں بخت نارسا کی شکایت کریں عبث

ہم کو بھی جو ہمارے مقدر میں تھا ملا

زہر غم حیات گوارا تھا کب مگر

یہ سلسلہ بھی تیری تمنا سے جا ملا

باقی رہی کشاکش گرداب و بحر غم

کشتی کو ناخدا کا سہارا برا ملا

اپنے سے لوگ ہم کو زمیں پر نہ مل سکے

کوئی خدا ملا تو کوئی ناخدا ملا

افضلؔ دیار غیر میں بھٹکے تمام رات

کوئی دیا جلا نہ کوئی در کھلا ملا