har ek aankh ko kuchh TuTe KHwab de ke gaya

har ek aañkh ko kuchh TuuTe ḳhvāb de ke gayā

vo zindagī ko ye kaisā azaab de ke gayā

na de sakā mujhe vus.at samundaroñ kī magar

samundaroñ kā mujhe iztirāb de ke gayā

vo kis liye mirā dushman thā jaane kaun thā vo

jo aañkh aañkh musalsal sarāb de ke gayā

ḳhalā ke naam atā kar ke chhāñv kī mīrās

mujhe vo jaltā huā āftāb de ke gayā

vo peḌ ūñchī chaTānoñ pe ab bhī tanhā haiñ

unhī ko saarī matā-e-sahāb de ke gayā

har ek lafz meñ rakh kar sarāb ma.anī kā

har ek haath meñ vo ik kitāb de ke gayā

maiñ kul huuñ aur tū juz meñ bhī kul hai ai 'manzūr'

bichhaḌte vaqt mujhe ye ḳhitāb de ke gayā

har ek aankh ko kuchh TuTe KHwab de ke gaya

wo zindagi ko ye kaisa azab de ke gaya

na de saka mujhe wusat samundaron ki magar

samundaron ka mujhe iztirab de ke gaya

wo kis liye mera dushman tha jaane kaun tha wo

jo aankh aankh musalsal sarab de ke gaya

KHala ke nam ata kar ke chhanw ki miras

mujhe wo jalta hua aaftab de ke gaya

wo peD unchi chaTanon pe ab bhi tanha hain

unhi ko sari mata-e-sahab de ke gaya

har ek lafz mein rakh kar sarab mani ka

har ek hath mein wo ek kitab de ke gaya

main kul hun aur tu juz mein bhi kul hai ai 'manzur'

bichhaDte waqt mujhe ye KHitab de ke gaya