har ek barg-e-chaman mushk-bar aaega

har ek barg-e-chaman mushk-bār aa.egā

ḳhizāñ ke ba.ad gul-e-nau-bahār aa.egā

bulandiyāñ to mashaqqat se haath aatī haiñ

guloñ ke saath yaqīnī hai ḳhaar aa.egā

mujhe yaqīñ hai kisī din to ai jafā-pesha

tujhe bhī merī vafāoñ pe pyaar aa.egā

hamārā ishq karāmat se kam nahīñ jānāñ

tumhāre husn pe is se nikhār aa.egā

agar maiñ tum se tumhārī tarah karūñ va.ade

tumhī batāo tumheñ e.atibār aa.egā

jahāñ pe ahl-e-junūñ tum ko raqs karte mileñ

usī navāh meñ merā dayār aa.egā

jahāñ vatan ke shahīdoñ kā tazkira hogā

hamārā naam vahāñ baar baar aa.egā

tamām raat dar-e-mai-kadā khulā rakhnā

sunā hai koī tahajjud-guzār aa.egā

har ek barg-e-chaman mushk-bar aaega

KHizan ke baad gul-e-nau-bahaar aaega

bulandiyan to mashaqqat se hath aati hain

gulon ke sath yaqini hai KHar aaega

mujhe yaqin hai kisi din to ai jafa-pesha

tujhe bhi meri wafaon pe pyar aaega

hamara ishq karamat se kam nahin jaanan

tumhaare husn pe is se nikhaar aaega

agar main tum se tumhaari tarah karun wade

tumhi batao tumhein eatibar aaega

jahan pe ahl-e-junun tum ko raqs karte milen

usi nawah mein mera dayar aaega

jahan watan ke shahidon ka tazkira hoga

hamara nam wahan bar bar aaega

tamam raat dar-e-mai-kada khula rakhna

suna hai koi tahajjud-guzar aaega