har ek gam pe sadiyan nisar karte hue

har ek gaam pe sadiyāñ nisār karte hue

maiñ chal rahā thā zamāne shumār karte hue

yahī khulā ki musāfir ne ḳhud ko paar kiyā

tirī talāsh ke sahrā ko paar karte hue

maiñ rashk-e-resha-e-gul thā badal ke sañg huā

badan ko tere badan kā hisār karte hue

mujhe zarūr kināre pukārte hoñge

magar meñ sun nahīñ paayā pukār karte hue

meñ iztirāb-e-zamāna se bach nikaltā huuñ

tumhāre qaul ko dil kā qarār karte hue

jahān-e-ḳhvāb kī manzil kabhī nahīñ aa.ī

zamāne chalte rahe intizār karte ho.e

maiñ rāh-e-sūd-o-ziyāñ se guzartā jaatā huuñ

kabhī gurez kabhī iḳhtiyār karte hue

nahīñ girā mirī qātil anā kā taaj mahal

maiñ mar gayā huuñ ḳhud apne pe vaar karte hue

maiñ aur nīm-dilī se vafā kī raah chalūñ

maiñ apnī jaañ se guzartā huuñ pyaar karte hue

yaqīn chhoḌ ke nayyar gumāñ pakaḌtā rahā

nigāh-e-yār tirā e'tibār karte hue

har ek gam pe sadiyan nisar karte hue

main chal raha tha zamane shumar karte hue

yahi khula ki musafir ne KHud ko par kiya

teri talash ke sahra ko par karte hue

main rashk-e-resha-e-gul tha badal ke sang hua

badan ko tere badan ka hisar karte hue

mujhe zarur kinare pukarte honge

magar mein sun nahin paya pukar karte hue

mein iztirab-e-zamana se bach nikalta hun

tumhaare qaul ko dil ka qarar karte hue

jahan-e-KHwab ki manzil kabhi nahin aai

zamane chalte rahe intizar karte hoe

main rah-e-sud-o-ziyan se guzarta jata hun

kabhi gurez kabhi iKHtiyar karte hue

nahin gira meri qatil ana ka taj mahal

main mar gaya hun KHud apne pe war karte hue

main aur nim-dili se wafa ki rah chalun

main apni jaan se guzarta hun pyar karte hue

yaqin chhoD ke nayyar guman pakaDta raha

nigah-e-yar tera e'tibar karte hue