har ek hath mein patthar hai kya kiya jae

har ek haath meñ patthar hai kyā kiyā jaa.e

ye aa.ine kā muqaddar hai kyā kiyā jaa.e

banā liyā hai use markaz-e-nazar maiñ ne

sarāpā husn kā paikar hai kyā kiyā jaa.e

vo chāhe jaan bhī le le mirī to hai manzūr

mirā bharosa usī par hai kyā kiyā jaa.e

agar vo chāhe bhī ik pal to jī nahīñ saktā

ajal kā vaqt muqarrar hai kyā kiyā jaa.e

chalā gayā hai vo maqtal se qatl kar ke mujhe

ye jurm bhī mire sar par hai kyā kiyā jaa.e

koī mahal meñ rahe aur kisī ko chhat na mile

ye apnā apnā muqaddar hai kyā kiyā jaa.e

jo faḳhr kartā rahā hai mire usūloñ par

vo shaḳhs mujh se bhī behtar hai kyā kiyā jaa.e

junūn mujh ko hai sāhil talak pahuñchne kā

magar ye ġham kā samundar hai kyā kiyā jaa.e

har ek hath mein patthar hai kya kiya jae

ye aaine ka muqaddar hai kya kiya jae

bana liya hai use markaz-e-nazar main ne

sarapa husn ka paikar hai kya kiya jae

wo chahe jaan bhi le le meri to hai manzur

mera bharosa usi par hai kya kiya jae

agar wo chahe bhi ek pal to ji nahin sakta

ajal ka waqt muqarrar hai kya kiya jae

chala gaya hai wo maqtal se qatl kar ke mujhe

ye jurm bhi mere sar par hai kya kiya jae

koi mahal mein rahe aur kisi ko chhat na mile

ye apna apna muqaddar hai kya kiya jae

jo faKHr karta raha hai mere usulon par

wo shaKHs mujh se bhi behtar hai kya kiya jae

junun mujh ko hai sahil talak pahunchne ka

magar ye gham ka samundar hai kya kiya jae