har ek jism pe bas ek hi se gahne lage

har ek jism pe bas ek hī se gahne lage

hameñ to log tumhārā hī ruup pahne lage

bas ek lau sī nazar aa.ī thī phir us ke ba.ad

bujhe charāġh siyah pāniyoñ pe bahne lage

use bhī hādisa kahiye ki ḳhushk dariyā par

paḌī jo dhuup to patthar pighal ke bahne lage

rutoñ ne karvaTeñ badlīñ to ham ne bhī ik baar

phir apne ghar ko sajāyā aur us meñ rahne lage

na jaane kyuuñ mire ahbāb mere baare meñ

jo baat aam thī sargoshiyoñ meñ kahne lage

jo qatra qatra piyā ham ne zindagī kā zahr

to 'rind' ban ke har ik dil kā dard bahne lage

har ek jism pe bas ek hi se gahne lage

hamein to log tumhaara hi rup pahne lage

bas ek lau si nazar aai thi phir us ke baad

bujhe charagh siyah paniyon pe bahne lage

use bhi hadisa kahiye ki KHushk dariya par

paDi jo dhup to patthar pighal ke bahne lage

ruton ne karwaTen badlin to hum ne bhi ek bar

phir apne ghar ko sajaya aur us mein rahne lage

na jaane kyun mere ahbab mere bare mein

jo baat aam thi sargoshiyon mein kahne lage

jo qatra qatra piya hum ne zindagi ka zahr

to 'rind' ban ke har ek dil ka dard bahne lage