ہر ایک کام سلیقے سے شاندار کرو

ہر ایک کام سلیقے سے شاندار کرو

برے عمل سے بچو نیکیوں سے پیار کرو

چمن کی تازہ کلی بھی گلاب ہو جائے

بہار آنے تلک کچھ تو انتظار کرو

مدد غریب کی کرنا ثواب ہے پیارے

عظیم کام ہے اس کو تو بار بار کرو

عداوتوں کی فضا کہہ رہی ہے رو رو کر

وطن کا چہرۂ روشن نہ داغدار کرو

نحیف لاغر و مسکین مستحق سارے

گلے لگاؤ بچاروں کو خوب پیار کرو

جہاں سے ظلم و تشدد مٹا کے دم لیں گے

اسی جنون کو اعصاب پر سوار کرو

قدم قدم پہ بڑی مشکلیں بھی آئیں گی

مگر جو حق ہے وہی راہ اختیار کرو

یہی طلب تجھے طارقؔ رہی ہمیشہ سے

کہ قصہ ہائے تعلق میں اختصار کرو