har ek kaam saliqe se shandar karo

har ek kaam salīqe se shāndār karo

bure amal se bacho nekiyoñ se pyaar karo

chaman kī taaza kalī bhī gulāb ho jaa.e

bahār aane talak kuchh to intizār karo

madad ġharīb kī karnā savāb hai pyāre

aziim kaam hai is ko to baar baar karo

adāvatoñ kī fazā kah rahī hai ro ro kar

vatan kā chehra-e-raushan na dāġh-dār karo

nahīf lāġhar-o-miskīn mustahiq saare

gale lagāo bichāroñ ko ḳhuub pyaar karo

jahāñ se zulm-o-tashaddud miTā ke dam leñge

isī junūn ko a.asāb par savār karo

qadam qadam pe baḌī mushkileñ bhī ā.eñgī

magar jo haq hai vahī raah iḳhtiyār karo

yahī talab tujhe 'tāriq' rahī hamesha se

ki qissa-hā-e-ta'alluq meñ iḳhtisār karo

har ek kaam saliqe se shandar karo

bure amal se bacho nekiyon se pyar karo

chaman ki taza kali bhi gulab ho jae

bahaar aane talak kuchh to intizar karo

madad gharib ki karna sawab hai pyare

azim kaam hai is ko to bar bar karo

adawaton ki faza kah rahi hai ro ro kar

watan ka chehra-e-raushan na dagh-dar karo

nahif laghar-o-miskin mustahiq sare

gale lagao bichaaron ko KHub pyar karo

jahan se zulm-o-tashaddud miTa ke dam lenge

isi junun ko aasab par sawar karo

qadam qadam pe baDi mushkilen bhi aaengi

magar jo haq hai wahi rah iKHtiyar karo

yahi talab tujhe 'tariq' rahi hamesha se

ki qissa-ha-e-ta'alluq mein iKHtisar karo