har ek KHaliya ko aaina ghar banate hue

har ek ḳhaliya ko ā.īna ghar banāte hue

bahut baTā huuñ badan mo'tabar banāte hue

mere nuzūl meñ saat āsmāñ kī gardish hai

utar rahā huuñ diloñ meñ bhañvar banāte hue

adam kī rag meñ jo ik lahar hai vahīñ se kahīñ

guzar gayā huuñ safar muḳhtasar banāte hue

mirī hathelī pe Thahrā hai irtiqā kā bahāo

jahāñ kī ḳhaak se apnā khañDar banāte hue

ki do jahān ke isbāt maiñ ne phūñke haiñ

tere sadaf meñ nafī kā guhar banāte hue

jagā.ūñ kis ke manāzir ufuq kī āñkhoñ meñ

ki maiñ hī ḳhvāb huā huuñ nazar banāte hue

'riyāz' phir se bhaTaktā hai jugnuoñ kī tarah

kisī kī raat meñ dil ko sharar banāte hue

har ek KHaliya ko aaina ghar banate hue

bahut baTa hun badan mo'tabar banate hue

mere nuzul mein sat aasman ki gardish hai

utar raha hun dilon mein bhanwar banate hue

adam ki rag mein jo ek lahar hai wahin se kahin

guzar gaya hun safar muKHtasar banate hue

meri hatheli pe Thahra hai irtiqa ka bahao

jahan ki KHak se apna khanDar banate hue

ki do jahan ke isbaat main ne phunke hain

tere sadaf mein nafi ka guhar banate hue

jagaun kis ke manazir ufuq ki aankhon mein

ki main hi KHwab hua hun nazar banate hue

'riyaz' phir se bhaTakta hai jugnuon ki tarah

kisi ki raat mein dil ko sharar banate hue