har ek ko har martaba hasil nahin hota

har ek ko har martaba hāsil nahīñ hotā

ā.īna sikandar ke muqābil nahīñ hotā

be-lutf hai vo kaam musībat nahīñ jis meñ

be-qadr hai vo uqda jo mushkil nahīñ hotā

tum vasl meñ dīvāngī-e-shauq se Darnā

maiñ kashmakash-e-nāz se be-dil nahīñ hotā

kis kaam kā ai qais tirā chāk-e-garebāñ

lailā kā agar parda-e-mahmil nahīñ hotā

maiñ ḳhirman-e-ummīd huuñ tū barq-e-ġhazab hai

tujh se ba-juz afsos ke hāsil nahīñ hotā

kyā zulm hai be-parda use ġhair ne dekhā

kyuuñ parda mirī aañkh kā haa.il nahīñ hotā

naale se na kyuuñ dard-e-jigar aur bhī baḌhtā

dashne se sivā zaḳhm ke hāsil nahīñ hotā

huuñ misl-e-habāb aur kahīñ qatra huuñ kahīñ mauj

maiñ zauq-e-fanā se kabhī ġhāfil nahīñ hotā

kahte haiñ mire zaḳhm ye hañs hañs ke maza meñ

aisā namakīñ ḳhanda-e-qātil nahīñ hotā

haañ ġhair bhī kyā da.avā-e-ulfat meñ hai jhūTā

kahte ho kisī par koī maa.il nahīñ hotā

khoyā tumheñ 'ushshāq kī be-hauslagī ne

mahshar meñ tumhārā koī saa.il nahīñ hotā

jaada pe chale jaate haiñ jo raast qadam haiñ

ye ḳhizr judā tā-sar-e-manzil nahīñ hotā

andāza-e-himmat se koī shai nahīñ baḌhtī

yā'nī ḳhat-e-sāġhar ḳhat-e-sāhil nahīñ hotā

har ḳhāl-e-siyah dāġh-e-jigar ban nahīñ saktā

har qatra-e-ḳhūnāb kabhī dil nahīñ hotā

tujh ko hī magar aag lagānī nahīñ aatī

kyā tuur se achchhā bhī koī dil nahīñ hotā

duniyā se 'vafā' sard yahāñ tak hai mirā dil

maiñ soz-e-jahannam kā bhī qaa.il nahīñ hotā

har ek ko har martaba hasil nahin hota

aaina sikandar ke muqabil nahin hota

be-lutf hai wo kaam musibat nahin jis mein

be-qadr hai wo uqda jo mushkil nahin hota

tum wasl mein diwangi-e-shauq se Darna

main kashmakash-e-naz se be-dil nahin hota

kis kaam ka ai qais tera chaak-e-gareban

laila ka agar parda-e-mahmil nahin hota

main KHirman-e-ummid hun tu barq-e-ghazab hai

tujh se ba-juz afsos ke hasil nahin hota

kya zulm hai be-parda use ghair ne dekha

kyun parda meri aankh ka hail nahin hota

nale se na kyun dard-e-jigar aur bhi baDhta

dashne se siwa zaKHm ke hasil nahin hota

hun misl-e-habab aur kahin qatra hun kahin mauj

main zauq-e-fana se kabhi ghafil nahin hota

kahte hain mere zaKHm ye hans hans ke maza mein

aisa namakin KHanda-e-qatil nahin hota

han ghair bhi kya dawa-e-ulfat mein hai jhuTa

kahte ho kisi par koi mail nahin hota

khoya tumhein 'ushshaq ki be-hauslagi ne

mahshar mein tumhaara koi sail nahin hota

jada pe chale jate hain jo rast qadam hain

ye KHizr juda ta-sar-e-manzil nahin hota

andaza-e-himmat se koi shai nahin baDhti

ya'ni KHat-e-saghar KHat-e-sahil nahin hota

har KHal-e-siyah dagh-e-jigar ban nahin sakta

har qatra-e-KHunab kabhi dil nahin hota

tujh ko hi magar aag lagani nahin aati

kya tur se achchha bhi koi dil nahin hota

duniya se 'wafa' sard yahan tak hai mera dil

main soz-e-jahannam ka bhi qail nahin hota