har ek nazar ho husn-e-nazar ai dost ye aisa khel nahin

har ek nazar ho husn-e-nazar ai dost ye aisā khel nahīñ

jalve kā nazāra khel bhī hai jalve kā nazārā khel nahīñ

ik umr guloñ ke saa.e meñ guzrī to samajh meñ baat aa.ī

gulshan kī fazā meñ kāñToñ se dāman kā bachānā khel nahīñ

tū ishq ke ġham ko ai vaa.iz apnā ġham-e-isyāñ samjhā hai

ye terī samajh se bāhar hai is ġham kā samajhnā khel nahīñ

ye kaam baḌī jur.at kā hai ye baat baḌī himmat kī hai

ḳhud apnā nasheman apne hī hāthoñ se jalānā khel nahīñ

kuchh dil hī hamārā vāqif hai jo ham pe musībat paḌtī hai

māhaul-e-muḳhālif meñ rah kar haq apnā jatānā khel nahīñ

jis vaqt nigāheñ un se milīñ kuchh kahte sunte ban na paḌī

ehsās-e-tamannā āsāñ hai tafsīr-e-tamanna khel nahīñ

ai dost hamārī tarah zarā himmat kī zarūrat hotī hai

maiḳhāne meñ baḌh kar saaqī se nazroñ kā milānā khel nahīñ

duniyā pe kabhī ham hañste the ab ham pe ye duniyā hañstī hai

auroñ kā tamāsha khel sahī ḳhud apnā tamāsha khel nahīñ

kuchh sar kī yahāñ taḳhsīs nahīñ hai dil kī zarūrat 'sājid' ko

sajde kī to manzil aur hai kuchh sajde kā irāda khel nahīñ

har ek nazar ho husn-e-nazar ai dost ye aisa khel nahin

jalwe ka nazara khel bhi hai jalwe ka nazara khel nahin

ek umr gulon ke sae mein guzri to samajh mein baat aai

gulshan ki faza mein kanTon se daman ka bachana khel nahin

tu ishq ke gham ko ai waiz apna gham-e-isyan samjha hai

ye teri samajh se bahar hai is gham ka samajhna khel nahin

ye kaam baDi jurat ka hai ye baat baDi himmat ki hai

KHud apna nasheman apne hi hathon se jalana khel nahin

kuchh dil hi hamara waqif hai jo hum pe musibat paDti hai

mahaul-e-muKHalif mein rah kar haq apna jatana khel nahin

jis waqt nigahen un se milin kuchh kahte sunte ban na paDi

ehsas-e-tamanna aasan hai tafsir-e-tamanna khel nahin

ai dost hamari tarah zara himmat ki zarurat hoti hai

maiKHane mein baDh kar saqi se nazron ka milana khel nahin

duniya pe kabhi hum hanste the ab hum pe ye duniya hansti hai

auron ka tamasha khel sahi KHud apna tamasha khel nahin

kuchh sar ki yahan taKHsis nahin hai dil ki zarurat 'sajid' ko

sajde ki to manzil aur hai kuchh sajde ka irada khel nahin