har ek rah se aage hai KHwab ki manzil

har ek raah se aage hai ḳhvāb kī manzil

tire huzūr se baḌh kar ġhayāb kī manzil

nahīñ hai aap hī maqsūd apnā jauhar-e-zāt

ki āftāb nahīñ āftāb kī manzil

kuchh aisā rañj diyā bachpane kī ulfat ne

phir us ke ba.ad na aa.ī shabāb kī manzil

musāfiroñ ko barābar nahīñ zamān-o-makāñ

havā kā ek qadam aur habāb kī manzil

mohabbatoñ ke ye lamhe dareġh kyuuñ kiije

bhugat hī leñge jo aa.ī hisāb kī manzil

milegī bāda-gusāroñ ko shaiḳh kyā jaane

gunah kī raah se ho kar savāb kī manzil

masām naach rahe haiñ muāmlat ke liye

guzar ga.ī hai savāl-o-javāb kī manzil

milī jo aas to sab marhale hue āsāñ

nahīñ hai koī bhī manzil sarāb kī manzil

mizāj-e-dard ko āsūdgī se raas karo

kahāñ milegī tumheñ iztirāb kī manzil

rah-e-junūñ meñ talab ke sivā nahīñ 'sayyad'

agarche tai ho ḳhudā kī kitāb kī manzil

har ek rah se aage hai KHwab ki manzil

tere huzur se baDh kar ghayab ki manzil

nahin hai aap hi maqsud apna jauhar-e-zat

ki aaftab nahin aaftab ki manzil

kuchh aisa ranj diya bachpane ki ulfat ne

phir us ke baad na aai shabab ki manzil

musafiron ko barabar nahin zaman-o-makan

hawa ka ek qadam aur habab ki manzil

mohabbaton ke ye lamhe daregh kyun kije

bhugat hi lenge jo aai hisab ki manzil

milegi baada-gusaron ko shaiKH kya jaane

gunah ki rah se ho kar sawab ki manzil

masam nach rahe hain muamlat ke liye

guzar gai hai sawal-o-jawab ki manzil

mili jo aas to sab marhale hue aasan

nahin hai koi bhi manzil sarab ki manzil

mizaj-e-dard ko aasudgi se ras karo

kahan milegi tumhein iztirab ki manzil

rah-e-junun mein talab ke siwa nahin 'sayyad'

agarche tai ho KHuda ki kitab ki manzil