har ek rang har ek KHwab ke hisar mein tu

har ek rang har ik ḳhvāb ke hisār meñ tū

ki āñsuoñ kī tarah chashm-e-intizār meñ tū

udaas raakh se manzar ke ek shahr meñ maiñ

na.e jahān kī ik sub.h-e-zar-nigār maiñ tū

meñ itnī duur ufuq se pare bhī dekh aayā

milā to jism pe bikhre hue ġhubār meñ tū

meñ zaḳhm zaḳhm ḳhizāoñ ke biich zinda huuñ

numū-pazīr bahāroñ ke rañg-zār meñ tū

ki terā naam to jalte diyoñ kī lau meñ hai

tū bāñsurī kī har ik taan meñ pukār meñ tū

ye rahguzar to tamāzat ke shahr ko jaa.e

kahīñ jale na bahishtoñ ke e'tibār meñ tū

mujhe bachā le ta'āqub se zard mausam ke

mujhe chhupā le panāhoñ ke sabz ġhaar meñ tū

har ek rang har ek KHwab ke hisar mein tu

ki aansuon ki tarah chashm-e-intizar mein tu

udas rakh se manzar ke ek shahr mein main

nae jahan ki ek subh-e-zar-nigar main tu

mein itni dur ufuq se pare bhi dekh aaya

mila to jism pe bikhre hue ghubar mein tu

mein zaKHm zaKHm KHizaon ke bich zinda hun

numu-pazir bahaaron ke rang-zar mein tu

ki tera nam to jalte diyon ki lau mein hai

tu bansuri ki har ek tan mein pukar mein tu

ye rahguzar to tamazat ke shahr ko jae

kahin jale na bahishton ke e'tibar mein tu

mujhe bacha le ta'aqub se zard mausam ke

mujhe chhupa le panahon ke sabz ghaar mein tu