har ek rang mein yun Dub kar nikharte rahe

har ek rañg meñ yuuñ Duub kar nikharte rahe

ḳhutūt naqsh-e-musavvir meñ rañg bharte rahe

ḳhudā bachā.e bagūloñ kī zad meñ aa.e haiñ

vo barg-e-sabz jo mauj-e-havā se Darte rahe

unhīñ ke paañv se lipTī huī hai mauj-e-hayāt

jo be kanār samundar ke paar utarte rahe

kahāñ thī jur.at-e-nazzāra-e-jamāl-e-sahar

agarche gesū-e-shab rāt-bhar sañvarte rahe

vahīñ bahār-ba-kaf qāfile lapak ke chale

jahāñ jahāñ tire naqsh-e-qadam ubharte rahe

agarche basta-e-dām-e-ḳhayāl the lekin

kushūda uqda-e-lail-o-nahār karte rahe

unhīñ ke saath hai apnā safar 'tamannā.ī'

vo ḳhush-ḳhirām jo har daur se guzarte rahe

har ek rang mein yun Dub kar nikharte rahe

KHutut naqsh-e-musawwir mein rang bharte rahe

KHuda bachae bagulon ki zad mein aae hain

wo barg-e-sabz jo mauj-e-hawa se Darte rahe

unhin ke panw se lipTi hui hai mauj-e-hayat

jo be kanar samundar ke par utarte rahe

kahan thi jurat-e-nazzara-e-jamal-e-sahar

agarche gesu-e-shab raat-bhar sanwarte rahe

wahin bahaar-ba-kaf qafile lapak ke chale

jahan jahan tere naqsh-e-qadam ubharte rahe

agarche basta-e-dam-e-KHayal the lekin

kushuda uqda-e-lail-o-nahaar karte rahe

unhin ke sath hai apna safar 'tamannai'

wo KHush-KHiram jo har daur se guzarte rahe