har ek samt hai chhaya sukut ka manzar

har ek samt hai chhāyā sukūt kā manzar

dhaḌak rahā hai magar zalzala mire andar

zamīñ kā zarf falak kā vaqār rakhte haiñ

zamīñ-nazhād sahī āsmān par hai nazar

Darā na pā.eñge ham ko ye sar-phire tūfāñ

ki mauj-e-azm to jā kar rukegī sāhil par

tujhe ye naaz ki mirrīḳh tak tū jā pahuñchā

magar nazar nahīñ aatā hai tujh ko apnā ghar

ye zulmatoñ ke pujārī haiñ in se kuchh na kaho

dikhā.ī dete haiñ bāhar se ā.ina-paikar

guzar rahī hai ajab kashmakash meñ merī hayāt

na chain ghar ke hai andar na ghar ke hai bāhar

ajiib shahr kā aalam hai aaj ai 'najma'

na sāmne koī manzar na ab hai pas-manzar

har ek samt hai chhaya sukut ka manzar

dhaDak raha hai magar zalzala mere andar

zamin ka zarf falak ka waqar rakhte hain

zamin-nazhad sahi aasman par hai nazar

Dara na paenge hum ko ye sar-phire tufan

ki mauj-e-azm to ja kar rukegi sahil par

tujhe ye naz ki mirriKH tak tu ja pahuncha

magar nazar nahin aata hai tujh ko apna ghar

ye zulmaton ke pujari hain in se kuchh na kaho

dikhai dete hain bahar se aaina-paikar

guzar rahi hai ajab kashmakash mein meri hayat

na chain ghar ke hai andar na ghar ke hai bahar

ajib shahr ka aalam hai aaj ai 'najma'

na samne koi manzar na ab hai pas-manzar