har ek samt hai ek jit haar ka mausam

har ek samt hai ik jiit haar kā mausam

ab ek ḳhvāb sā lagtā hai pyaar kā mausam

isī ko gardish-e-lail-o-nahār kahte haiñ

kabhī ḳhizāñ hai kabhī hai bahār kā mausam

chaman meñ dhuum machī hai ki fasl-e-gul aa.ī

yahī hai dāman-e-sad-tār-tār kā mausam

ab us ko yaad dilāne kā fā.eda hī nahīñ

vo bhuul bhī chukā qaul-o-qarār kā mausam

har ik shikast pe josh-e-amal meñ shiddat lā

miTegā dīda-e-ḳhūnāba-bār kā mausam

na aane de kabhī pā-e-sabāt meñ laġhzish

sadā milā hai kise iḳhtiyār kā mausam

rihā.ī miltī hai yaaro na jaan jaatī hai

azāb-e-jān hai ye intizār kā mausam

darāz kitnī hī shab ho guzar hī jā.egī

palaT ke aa.egā dīdār-e-yār kā mausam

jo lauh-e-dil pe lagāne chale ho daaġh pe daaġh

kabhī to aa.egā un ke shumār kā mausam

hai ab ye haal urūs-ul-bilād kā 'az.har'

Thahar gayā hai vahīñ gīr-o-dār kā mausam

har ek samt hai ek jit haar ka mausam

ab ek KHwab sa lagta hai pyar ka mausam

isi ko gardish-e-lail-o-nahaar kahte hain

kabhi KHizan hai kabhi hai bahaar ka mausam

chaman mein dhum machi hai ki fasl-e-gul aai

yahi hai daman-e-sad-tar-tar ka mausam

ab us ko yaad dilane ka faeda hi nahin

wo bhul bhi chuka qaul-o-qarar ka mausam

har ek shikast pe josh-e-amal mein shiddat la

miTega dida-e-KHunaba-bar ka mausam

na aane de kabhi pa-e-sabaat mein laghzish

sada mila hai kise iKHtiyar ka mausam

rihai milti hai yaro na jaan jati hai

azab-e-jaan hai ye intizar ka mausam

daraaz kitni hi shab ho guzar hi jaegi

palaT ke aaega didar-e-yar ka mausam

jo lauh-e-dil pe lagane chale ho dagh pe dagh

kabhi to aaega un ke shumar ka mausam

hai ab ye haal urus-ul-bilad ka 'azhar'

Thahar gaya hai wahin gir-o-dar ka mausam