ہر ایک سمت سے اٹھتا ہے اب دھواں یارو

ہر ایک سمت سے اٹھتا ہے اب دھواں یارو

بہار اور مرے گلشن میں اب کہاں یارو

ہر ایک پھول مہکتا تھا اس کی خوشبو سے

بہار تھی کبھی ہم پر بھی مہرباں یارو

میں چاہتا تھا کہ کچھ اپنے جی کی بات کروں

چلے گئے ہیں کہاں میرے رازداں یارو

مری نگاہ میں ابر کرم تو تھے شاہدؔ

سلگ رہا ہے مگر میرا آسماں یارو

اب اپنی پلکوں سے کانٹے ہٹانے پڑتے ہیں

تھے راستے کبھی میرے بھی گل فشاں یارو

میں دل کی بات کسی سے بھی کر نہیں پایا

مجھے ملا ہی نہیں کوئی ہم زباں یارو

کچھ اپنی کرنی کا ہی پا رہے ہیں پھل شاہدؔ

رہے ہیں ہم کو بھی کیا جانے کیا گماں یارو