har ek samt se uThta hai ab dhuan yaro

har ek samt se uThtā hai ab dhuāñ yaaro

bahār aur mire gulshan meñ ab kahāñ yaaro

har ek phuul mahaktā thā us kī ḳhushbū se

bahār thī kabhī ham par bhī mehrbāñ yaaro

maiñ chāhtā thā ki kuchh apne jī kī baat karūñ

chale ga.e haiñ kahāñ mere rāz-dāñ yaaro

mirī nigāh meñ abr-e-karam to the 'shāhid'

sulag rahā hai magar merā āsmāñ yaaro

ab apnī palkoñ se kāñTe haTāne paḌte haiñ

the rāste kabhī mere bhī gul-fishāñ yaaro

maiñ dil kī baat kisī se bhī kar nahīñ paayā

mujhe milā hī nahīñ koī ham-zabāñ yaaro

kuchh apnī karnī kā hī pā rahe haiñ phal 'shāhid'

rahe haiñ ham ko bhī kyā jaane kyā gumāñ yaaro

har ek samt se uThta hai ab dhuan yaro

bahaar aur mere gulshan mein ab kahan yaro

har ek phul mahakta tha us ki KHushbu se

bahaar thi kabhi hum par bhi mehrban yaro

main chahta tha ki kuchh apne ji ki baat karun

chale gae hain kahan mere raaz-dan yaro

meri nigah mein abr-e-karam to the 'shahid'

sulag raha hai magar mera aasman yaro

ab apni palkon se kanTe haTane paDte hain

the raste kabhi mere bhi gul-fishan yaro

main dil ki baat kisi se bhi kar nahin paya

mujhe mila hi nahin koi ham-zaban yaro

kuchh apni karni ka hi pa rahe hain phal 'shahid'

rahe hain hum ko bhi kya jaane kya guman yaro