har ek shab ke guzarne pe muskuraati hai

har ek shab ke guzarne pe muskurātī hai

ye zindagī yuuñ mujhe hausla dilātī hai

tumhāre hāthoñ ne thāmā hai jab se haath mirā

har ek samt se ThanDī havā hī aatī hai

jidhar bhī jā.ūñ kisī samt bhī chalūñ chāhe

hai jo bhī raah mujhe tum se hī milātī hai

suneñge tujh ko bhī gar mil ga.ī hameñ fursat

tū itnā shor kyuuñ ai zindagī machātī hai

zamāne bhar meñ mire aib uchhālne vaale

tirī ye baat mujhe har ghaḌī rulātī hai

agarche der huī manziloñ ko paane meñ

'hinā' har ek qadam azm se uThātī hai

har ek shab ke guzarne pe muskuraati hai

ye zindagi yun mujhe hausla dilati hai

tumhaare hathon ne thama hai jab se hath mera

har ek samt se ThanDi hawa hi aati hai

jidhar bhi jaun kisi samt bhi chalun chahe

hai jo bhi rah mujhe tum se hi milati hai

sunenge tujh ko bhi gar mil gai hamein fursat

tu itna shor kyun ai zindagi machati hai

zamane bhar mein mere aib uchhaalne wale

teri ye baat mujhe har ghaDi rulati hai

agarche der hui manzilon ko pane mein

'hina' har ek qadam azm se uThati hai