har ek shai pe hai partaw-fagan bahaar ka rang

har ek shai pe hai partav-fagan bahār kā rang

guloñ kā husn judā hai alag hai ḳhaar kā rang

lahū meñ jaise machalte hoñ barq-pāre se

ye intizār kā aalam ye intizār kā rang

kuchh aaj dil kī ḳharābī guzar ga.ī had se

uḌā uḌā sā hai har ek ġham-gusār kā rang

kabhī to sun mirī betābi-e-firāq kā haal

kabhī to dekh mirī chashm-e-ashk-bār kā rang

tire karam se bhī niyyat na ishq kī badlī

vahī hai fitrat-e-ma.asūm-o-sāda-kār kā rang

bulāo ahl-e-junūñ ko kisī bulandī se

bigaḌ chalā hai bahut bazm-e-rozgār kā rang

'adīb' kāvish-e-ġham kaam kar ga.ī shāyad

ab un ke ruḳh se jhalakne lagā hai pyaar kā rang

har ek shai pe hai partaw-fagan bahaar ka rang

gulon ka husn juda hai alag hai KHar ka rang

lahu mein jaise machalte hon barq-pare se

ye intizar ka aalam ye intizar ka rang

kuchh aaj dil ki KHarabi guzar gai had se

uDa uDa sa hai har ek gham-gusar ka rang

kabhi to sun meri betabi-e-firaq ka haal

kabhi to dekh meri chashm-e-ashk-bar ka rang

tere karam se bhi niyyat na ishq ki badli

wahi hai fitrat-e-masum-o-sada-kar ka rang

bulao ahl-e-junun ko kisi bulandi se

bigaD chala hai bahut bazm-e-rozgar ka rang

'adib' kawish-e-gham kaam kar gai shayad

ab un ke ruKH se jhalakne laga hai pyar ka rang