har ek shakl mein surat nai malal ki hai

har ek shakl meñ sūrat na.ī malāl kī hai

hamāre chāroñ taraf raushnī malāl kī hai

ham apne hijr meñ terā visāl dekhte haiñ

yahī ḳhushī kī hai sā.at, yahī malāl kī hai

hamāre ḳhāna-e-dil meñ nahīñ hai kyā kyā kuchh

ye aur baat ki har shai isī malāl kī hai

abhī se shauq kī āzurdagī kā rañj na kar

ki dil ko taab ḳhushī kī na thī malāl kī hai

kisī kā rañj ho, apnā samajhne lagte haiñ

vabāl-e-jāñ ye kushāda-dilī malāl kī hai

nahīñ hai ḳhvāhish-e-āsūdgī-e-vasl hameñ

javāz-e-ishq to bas tishnagī malāl kī hai

guzishta raat ka.ī baar dil ne ham se kahā

ki ho na ho ye ghuTan āḳhirī malāl kī hai

ragoñ meñ chīḳhtā phirtā hai ek sail-e-junūñ

agarche lahje meñ shā.istagī malāl kī hai

ajiib hotā hai ehsās kā talavvun bhī

abhī ḳhushī kī ḳhushī thii, abhī malāl kī hai

ye kis umiid pe chalne lagī hai bād-e-murād?

ḳhabar nahīñ hai use, ye ghaḌī malāl kī hai

duā karo ki rahe darmiyāñ ye be-suḳhanī

ki guftugū meñ to be-pardagī malāl kī hai

tirī ġhazal meñ ajab kaif hai magar 'irfān'

darūn-e-ramz-o-kināya kamī malāl kī hai

har ek shakl mein surat nai malal ki hai

hamare chaaron taraf raushni malal ki hai

hum apne hijr mein tera visal dekhte hain

yahi KHushi ki hai saat, yahi malal ki hai

hamare KHana-e-dil mein nahin hai kya kya kuchh

ye aur baat ki har shai isi malal ki hai

abhi se shauq ki aazurdagi ka ranj na kar

ki dil ko tab KHushi ki na thi malal ki hai

kisi ka ranj ho, apna samajhne lagte hain

wabaal-e-jaan ye kushada-dili malal ki hai

nahin hai KHwahish-e-asudgi-e-wasl hamein

jawaz-e-ishq to bas tishnagi malal ki hai

guzishta raat kai bar dil ne hum se kaha

ki ho na ho ye ghuTan aaKHiri malal ki hai

ragon mein chiKHta phirta hai ek sail-e-junun

agarche lahje mein shaistagi malal ki hai

ajib hota hai ehsas ka talawwun bhi

abhi KHushi ki KHushi thi, abhi malal ki hai

ye kis umid pe chalne lagi hai baad-e-murad?

KHabar nahin hai use, ye ghaDi malal ki hai

dua karo ki rahe darmiyan ye be-suKHani

ki guftugu mein to be-pardagi malal ki hai

teri ghazal mein ajab kaif hai magar 'irfan'

darun-e-ramz-o-kinaya kami malal ki hai