har faza aur har ek samt nazar rakhta hun

har fazā aur har ik samt nazar rakhtā huuñ

maiñ huuñ shā.ir maiñ do-ālam kī ḳhabar rakhtā huuñ

ye na samjho ki hai mujh ko kisī manzil kī talāsh

ḳhud maiñ manzil huuñ magar zauq-e-safar rakhtā huuñ

rahrav-e-rāh-e-mohabbat kī hai manzil hī judā

maiñ zamāne se alag rāhguzar rakhtā huuñ

sher meñ ḳhūn-e-jigar se mire rangīnī hai

shā.erī ke liye maiñ ḳhūn-e-jigar rakhtā huuñ

ik nazar se mirī TuuTe hue dil juḌte haiñ

maiñ masīhā huuñ mohabbat kī nazar rakhtā huuñ

ḳhud-baḳhud dil se mire sher Tapak jaate haiñ

kab ġhazal kahne kā varna maiñ hunar rakhtā huuñ

har-nafas jalva-e-sad-rang kā aalam hai 'payām'

jalva-e-husn ba-unvān-e-digar rakhtā huuñ

har faza aur har ek samt nazar rakhta hun

main hun shair main do-alam ki KHabar rakhta hun

ye na samjho ki hai mujh ko kisi manzil ki talash

KHud main manzil hun magar zauq-e-safar rakhta hun

rahraw-e-rah-e-mohabbat ki hai manzil hi juda

main zamane se alag rahguzar rakhta hun

sher mein KHun-e-jigar se mere rangini hai

shaeri ke liye main KHun-e-jigar rakhta hun

ek nazar se meri TuTe hue dil juDte hain

main masiha hun mohabbat ki nazar rakhta hun

KHud-baKHud dil se mere sher Tapak jate hain

kab ghazal kahne ka warna main hunar rakhta hun

har-nafas jalwa-e-sad-rang ka aalam hai 'payam'

jalwa-e-husn ba-unwan-e-digar rakhta hun