ہر فضا اور ہر اک سمت نظر رکھتا ہوں

ہر فضا اور ہر اک سمت نظر رکھتا ہوں

میں ہوں شاعر میں دو عالم کی خبر رکھتا ہوں

یہ نہ سمجھو کہ ہے مجھ کو کسی منزل کی تلاش

خود میں منزل ہوں مگر ذوق سفر رکھتا ہوں

رہرو راہ محبت کی ہے منزل ہی جدا

میں زمانے سے الگ راہ گزر رکھتا ہوں

شعر میں خون جگر سے مرے رنگینی ہے

شاعری کے لئے میں خون جگر رکھتا ہوں

اک نظر سے مری ٹوٹے ہوئے دل جڑتے ہیں

میں مسیحا ہوں محبت کی نظر رکھتا ہوں

خود بخود دل سے مرے شعر ٹپک جاتے ہیں

کب غزل کہنے کا ورنہ میں ہنر رکھتا ہوں

ہر نفس جلوۂ صد رنگ کا عالم ہے پیامؔ

جلوۂ حسن بعنوان دگر رکھتا ہوں