har-gam hadse hain muqaddar bane hue

har-gām hādse haiñ muqaddar bane hue

rahzan dikhā.ī dete haiñ rahbar bane hue

vo daur-e-ḳhush-gavār ḳhudā jaane kyā huā

mandir the masjidoñ ke barābar bane hue

kyā āshiyāñ kahāñ kā chaman kaise rang-o-bū

muddat huī qafas ko mirā ghar bane hue

ham vo nahīñ jo rāz-e-ġham-e-dil ayaañ kareñ

zindāñ haiñ ham se log samundar bane hue

ai muflisī batā to sahī vo kidhar ga.e

kuchh log the ḳhulūs ke paikar bane hue

bhejā hai us ne ḳhat bhī to alfāz kī jagah

kāġhaz pe tiir haiñ kahīñ nashtar bane hue

shāyad nahīñ haiñ ab kahīñ gauhar-shanās log

hiire paḌe haiñ raah meñ patthar bane hue

qaa.em hai bād-e-marg bhī bāda-kashī mirī

rakkhe haiñ merī ḳhaak ke sāġhar bane hue

yāroñ ko 'ehtishām' banā kar hasīñ kitāb

baiThe haiñ aap dard kā daftar bane hue

har-gam hadse hain muqaddar bane hue

rahzan dikhai dete hain rahbar bane hue

wo daur-e-KHush-gawar KHuda jaane kya hua

mandir the masjidon ke barabar bane hue

kya aashiyan kahan ka chaman kaise rang-o-bu

muddat hui qafas ko mera ghar bane hue

hum wo nahin jo raaz-e-gham-e-dil ayan karen

zindan hain hum se log samundar bane hue

ai muflisi bata to sahi wo kidhar gae

kuchh log the KHulus ke paikar bane hue

bheja hai us ne KHat bhi to alfaz ki jagah

kaghaz pe tir hain kahin nashtar bane hue

shayad nahin hain ab kahin gauhar-shanas log

hire paDe hain rah mein patthar bane hue

qaem hai baad-e-marg bhi baada-kashi meri

rakkhe hain meri KHak ke saghar bane hue

yaron ko 'ehtisham' bana kar hasin kitab

baiThe hain aap dard ka daftar bane hue