har ghazal KHwab ki surat mein Dhali lagti hai

har ġhazal ḳhvāb kī sūrat meñ Dhalī lagtī hai

tere ehsās meñ bhī jādūgarī lagtī hai

muddatoñ baad ye sāvan ko bhalā kyā sūjhī

merī āñkhoñ meñ to har roz jhaḌī lagtī hai

ishq meñ ho ga.ī dīvānoñ sī hālat merī

maut har-vaqt mire sar pe khaḌī lagtī hai

husn-e-ta.abīr mirī aañkh meñ utrā kaise

tū koī huur hai yā koī parī lagtī hai

dhaḌkaneñ raqs meñ zanjīr-zanī kartī haiñ

ab ki jazbāt meñ shorīda-sarī lagtī hai

bhar diyā maiñ ne taġhazzul meñ sabhī rangoñ ko

terī tasvīr nigāhoñ meñ basī lagtī hai

baj rahī hai koī pāzeb fazā meñ shāyad

chāñd tāroñ pe koī shoḳh chaḌhī lagtī hai

dil hai ik dasht kī mānind tumhārā 'ushba'

tabhī qismat meñ sadā tishna-labī lagtī hai

har ghazal KHwab ki surat mein Dhali lagti hai

tere ehsas mein bhi jadugari lagti hai

muddaton baad ye sawan ko bhala kya sujhi

meri aankhon mein to har roz jhaDi lagti hai

ishq mein ho gai diwanon si haalat meri

maut har-waqt mere sar pe khaDi lagti hai

husn-e-tabir meri aankh mein utra kaise

tu koi hur hai ya koi pari lagti hai

dhaDkanen raqs mein zanjir-zani karti hain

ab ki jazbaat mein shorida-sari lagti hai

bhar diya main ne taghazzul mein sabhi rangon ko

teri taswir nigahon mein basi lagti hai

baj rahi hai koi pazeb faza mein shayad

chand taron pe koi shoKH chaDhi lagti hai

dil hai ek dasht ki manind tumhaara 'ushba'

tabhi qismat mein sada tishna-labi lagti hai