har ghaDi chalti hai talwar tere kuche mein

har ghaḌī chaltī hai talvār tire kūche meñ

roz mar rahte haiñ do-chār tire kūche meñ

shakl ko kyūñki na har dafa badal kar aa.uuñ

haiñ mirī taak meñ aġhyār tire kūche meñ

ġham se badlī hai mirī shakl to be-ḳhauf-o-ḳhatar

din ko bhī aate haiñ sau baar tire kūche meñ

na kare sū-e-chaman bhuul ke bhī ruḳh hargiz

aan kar bulbul-e-gulzār tire kūche meñ

nargisistāñ na samajh kholī huī āñkhoñ ko

haiñ tire tālib-e-dīdār tire kūche meñ

laa.e jab ghar se to behosh paḌā thā 'ārif'

ho gayā aan ke hushiyār tire kūche meñ

har ghaDi chalti hai talwar tere kuche mein

roz mar rahte hain do-chaar tere kuche mein

shakl ko kyunki na har dafa badal kar aaun

hain meri tak mein aghyar tere kuche mein

gham se badli hai meri shakl to be-KHauf-o-KHatar

din ko bhi aate hain sau bar tere kuche mein

na kare su-e-chaman bhul ke bhi ruKH hargiz

aan kar bulbul-e-gulzar tere kuche mein

nargisistan na samajh kholi hui aankhon ko

hain tere talib-e-didar tere kuche mein

lae jab ghar se to behosh paDa tha 'arif'

ho gaya aan ke hushiyar tere kuche mein