har ghaDi karb-e-musalsal mein kaTi jati hai

har ghaḌī karb-e-musalsal meñ kaTī jaatī hai

zindagī apne gunāhoñ kī sazā paatī hai

yaad aa.uuñ ki na aa.uuñ mirī qismat lekin

un se ummīd-e-mulāqāt chalī jaatī hai

yuuñ mire ba.ad hai duniyā pe udāsī taarī

jaise duniyā mire hālāt kā ġham khātī hai

jab bhī aatā hai tasavvur tire insānoñ kā

ek fariyād mire muñh se nikal jaatī hai

ḳhush raho dasht-e-tamannā kī havāo ki mujhe

tum se bichhḌe hue yāroñ kī mahak aatī hai

zindagī meñ ka.ī aise bhī mile the sāthī

ruuh ab jin ke tasavvur se bhī ghabrātī hai

ġhaur kartā huuñ jo 'shafqat' kabhī tanhā.ī meñ

apne hālāt pe tā-der hañsī aatī hai

har ghaDi karb-e-musalsal mein kaTi jati hai

zindagi apne gunahon ki saza pati hai

yaad aaun ki na aaun meri qismat lekin

un se ummid-e-mulaqat chali jati hai

yun mere baad hai duniya pe udasi tari

jaise duniya mere haalat ka gham khati hai

jab bhi aata hai tasawwur tere insanon ka

ek fariyaad mere munh se nikal jati hai

KHush raho dasht-e-tamanna ki hawao ki mujhe

tum se bichhDe hue yaron ki mahak aati hai

zindagi mein kai aise bhi mile the sathi

ruh ab jin ke tasawwur se bhi ghabraati hai

ghaur karta hun jo 'shafqat' kabhi tanhai mein

apne haalat pe ta-der hansi aati hai