har ghaDi mat ruTh us se pher pal mein mil na ja

har ghaḌī mat ruuTh us se pher pal meñ mil na jā

gar bhalā mānas hai us kūche meñ tū ai dil na jā

avval-e-ishq un butoñ kā lutf hai dām-e-fareb

us kī mehr-o-dilbarī par ai dil-e-mā.il na jā

teġh-e-kīñ se ḳhāk-o-ḳhūñ meñ kar liyā haa.e mujhe

raqs-e-bismil kā tamāshā dekh ai qātil na jā

ham-sarī kā us qad-e-mauzūñ se tū da.avā na kar

apnī had se bāhar ai shamshād-e-pādar-gil na jā

ishq ke kū meñ ki hai jā-e-malāmat be-ḳhabar

aanā phir vaañ se salāmat hai bahut mushkil na jā

zāhidā rindoñ kī gustāḳhī ko ḳhātir meñ na lā

ham se dīvānoñ kī bātoñ par tū ai aaqil na jā

haath maltā hī rahā 'hasrat' dil us ko de ke haif

haath se aisī tarah yā-rab kisī kā dil na jā

har ghaDi mat ruTh us se pher pal mein mil na ja

gar bhala manas hai us kuche mein tu ai dil na ja

awwal-e-ishq un buton ka lutf hai dam-e-fareb

us ki mehr-o-dilbari par ai dil-e-mail na ja

tegh-e-kin se KHak-o-KHun mein kar liya hae mujhe

raqs-e-bismil ka tamasha dekh ai qatil na ja

ham-sari ka us qad-e-mauzun se tu dawa na kar

apni had se bahar ai shamshad-e-padar-gil na ja

ishq ke ku mein ki hai ja-e-malamat be-KHabar

aana phir wan se salamat hai bahut mushkil na ja

zahida rindon ki gustaKHi ko KHatir mein na la

hum se diwanon ki baaton par tu ai aaqil na ja

hath malta hi raha 'hasrat' dil us ko de ke haif

hath se aisi tarah ya-rab kisi ka dil na ja