ہر گوشۂ چمن میں نوائے ہزار ہے

ہر گوشۂ چمن میں نوائے ہزار ہے

شاید کہ آج آمد فصل بہار ہے

دائم یہاں خوشی ہے نہ غم پائیدار ہے

پھر کس لئے جہاں میں بشر سوگوار ہے

ویسے تو زندگی سے تعلق نہیں رہا

زندہ ہوں اس لئے کہ ترا انتظار ہے

ہیں ان کے پاس سارے زمانے کی نعمتیں

لے دے کے میرے پاس دل داغدار ہے

میں جانتا ہوں اب وہ نہ آئیں گے لوٹ کر

وعدے پر ان کے پھر بھی مجھے اعتبار ہے

لگتا ہے اب قریب ہی منزل ہے دوستو

چھایا ہوا فضا میں جو گرد و غبار ہے

دعویٰ تو کر رہے ہیں سبھی ہوش کا کنولؔ

دیکھو تو ہوش میں بھی کوئی ہوشیار ہے