har gosha-e-chaman mein nawa-e-hazar hai

har gosha-e-chaman meñ navā-e-hazār hai

shāyad ki aaj āmad-e-fasl-e-bahār hai

daa.im yahāñ ḳhushī hai na ġham pā.edār hai

phir kis liye jahāñ meñ bashar sogvār hai

vaise to zindagī se ta'alluq nahīñ rahā

zinda huuñ is liye ki tirā intizār hai

haiñ un ke paas saare zamāne kī ne'mateñ

le de ke mere paas dil-e-dāġh-dār hai

maiñ jāntā huuñ ab vo na ā.eñge lauT kar

vā'de par un ke phir bhī mujhe e'tibār hai

lagtā hai ab qarīb hī manzil hai dosto

chhāyā huā fazā meñ jo gard-o-ġhubār hai

dā'vā to kar rahe haiñ sabhī hosh kā 'kañval'

dekho to hosh meñ bhī koī hoshiyār hai

har gosha-e-chaman mein nawa-e-hazar hai

shayad ki aaj aamad-e-fasl-e-bahaar hai

daim yahan KHushi hai na gham paedar hai

phir kis liye jahan mein bashar sogwar hai

waise to zindagi se ta'alluq nahin raha

zinda hun is liye ki tera intizar hai

hain un ke pas sare zamane ki ne'maten

le de ke mere pas dil-e-dagh-dar hai

main jaanta hun ab wo na aaenge lauT kar

wa'de par un ke phir bhi mujhe e'tibar hai

lagta hai ab qarib hi manzil hai dosto

chhaya hua faza mein jo gard-o-ghubar hai

da'wa to kar rahe hain sabhi hosh ka 'kanwal'

dekho to hosh mein bhi koi hoshiyar hai