har gosha-e-nazar mein samae hue ho tum

har gosha-e-nazar meñ samā.e hue ho tum

jaise ki mere sāmne aa.e hue ho tum

merī nigāh-e-shauq pe chhā.e hue ho tum

jalvoñ ko ḳhud hijāb banā.e hue ho tum

kyuuñ ik taraf nigāh jamā.e hue ho tum

kyā raaz hai jo mujh se chhupā.e hue ho tum

dil ne tumhāre husn ko baḳhshī haiñ rif.ateñ

dil ko magar nazar se girā.e hue ho tum

ye jo niyāz-e-ishq kā ehsās hai tumheñ

shāyad kisī ke naaz uThā.e hue ho tum

yā mehrbāniyoñ ke hī qābil nahīñ huuñ maiñ

yā vāqa'ī kisī ke sikhā.e hue ho tum

ab imtiyāz-e-parda-o-jalva nahīñ mujhe

chehre se kyuuñ naqāb uThā.e hue ho tum

uf re sitam 'shakīl' ye hālat to ho ga.ī

ab bhī karam kī aas lagā.e hue ho tum

har gosha-e-nazar mein samae hue ho tum

jaise ki mere samne aae hue ho tum

meri nigah-e-shauq pe chhae hue ho tum

jalwon ko KHud hijab banae hue ho tum

kyun ek taraf nigah jamae hue ho tum

kya raaz hai jo mujh se chhupae hue ho tum

dil ne tumhaare husn ko baKHshi hain rifaten

dil ko magar nazar se girae hue ho tum

ye jo niyaz-e-ishq ka ehsas hai tumhein

shayad kisi ke naz uThae hue ho tum

ya mehrbaniyon ke hi qabil nahin hun main

ya waqa'i kisi ke sikhae hue ho tum

ab imtiyaz-e-parda-o-jalwa nahin mujhe

chehre se kyun naqab uThae hue ho tum

uf re sitam 'shakil' ye haalat to ho gai

ab bhi karam ki aas lagae hue ho tum