har haal mein raha jo tera aasra mujhe

har haal meñ rahā jo tirā aasrā mujhe

māyūs kar sakā na hujūm-e-balā mujhe

har naġhme ne unhīñ kī talab kā diyā payām

har saaz ne unhīñ kī sunā.ī sadā mujhe

har baat meñ unhīñ kī ḳhushī kā rahā ḳhayāl

har kaam se ġharaz hai unhīñ kī razā mujhe

rahtā huuñ ġharq un ke tasavvur meñ roz o shab

mastī kā paḌ gayā hai kuchh aisā mazā mujhe

rakhiye na mujh pe tark-e-mohabbat kī tohmateñ

jis kā ḳhayāl tak bhī nahīñ hai ravā mujhe

kaafī hai un ke pā-e-hinā-basta kā ḳhayāl

haath aa.ī ḳhuub soz-e-jigar kī davā mujhe

kyā kahte ho ki aur lagā lo kisī se dil

tum sā nazar bhī aa.e koī dūsrā mujhe

begāna-e-adab kiye detī hai kyā karūñ

us mahv-e-nāz kī nigah-e-āshnā mujhe

us be-nishāñ ke milne kī 'hasrat' huī umiid

āb-e-baqā se baḌh ke hai zahr-e-fanā mujhe

har haal mein raha jo tera aasra mujhe

mayus kar saka na hujum-e-bala mujhe

har naghme ne unhin ki talab ka diya payam

har saz ne unhin ki sunai sada mujhe

har baat mein unhin ki KHushi ka raha KHayal

har kaam se gharaz hai unhin ki raza mujhe

rahta hun gharq un ke tasawwur mein roz o shab

masti ka paD gaya hai kuchh aisa maza mujhe

rakhiye na mujh pe tark-e-mohabbat ki tohmaten

jis ka KHayal tak bhi nahin hai rawa mujhe

kafi hai un ke pa-e-hina-basta ka KHayal

hath aai KHub soz-e-jigar ki dawa mujhe

kya kahte ho ki aur laga lo kisi se dil

tum sa nazar bhi aae koi dusra mujhe

begana-e-adab kiye deti hai kya karun

us mahw-e-naz ki nigah-e-ashna mujhe

us be-nishan ke milne ki 'hasrat' hui umid

aab-e-baqa se baDh ke hai zahr-e-fana mujhe