har ek dagh-e-dil shama san dekhta hun

har ik dāġh-e-dil sham.a saañ dekhtā huuñ

tirī anjuman zau-fishāñ dekhtā huuñ

ta.ayyun se āzād haiñ mere sajde

jabīñ par tirā āstāñ dekhtā huuñ

fareb-e-tasavvur hai qaid-e-qafas hai

har ik shāḳh par āshiyāñ dekhtā huuñ

maiñ rāh-e-talab kā huuñ pasmāñda rah-rav

ġhubār-e-rah-e-kārvāñ dekhtā huuñ

ba-andāza-e-zauq-e-īzā-pasandī

use aaj maiñ mehrbāñ dekhtā huuñ

pilā kar mujhe mahram-e-hosh rakkhā

ye e.ajāz-e-pīr-e-muġhāñ dekhtā huuñ

mirī zindagī mahram-e-ġham hai 'tābish'

nafas ko ba-rañg-e-fuġhāñ dekhtā huuñ

har ek dagh-e-dil shama san dekhta hun

teri anjuman zau-fishan dekhta hun

tayyun se aazad hain mere sajde

jabin par tera aastan dekhta hun

fareb-e-tasawwur hai qaid-e-qafas hai

har ek shaKH par aashiyan dekhta hun

main rah-e-talab ka hun pasmanda rah-raw

ghubar-e-rah-e-karwan dekhta hun

ba-andaza-e-zauq-e-iza-pasandi

use aaj main mehrban dekhta hun

pila kar mujhe mahram-e-hosh rakkha

ye eajaz-e-pir-e-mughan dekhta hun

meri zindagi mahram-e-gham hai 'tabish'

nafas ko ba-rang-e-fughan dekhta hun