ہر اک خواب پریشاں کو تو سلجھایا نہیں جاتا

ہر اک خواب پریشاں کو تو سلجھایا نہیں جاتا

جو غم ہے دوستوں کا وہ بھی سمجھایا نہیں جاتا

وہ اک مشکل جو کوئے یار سے دار و رسن تک تھی

وجود اس کا دماغ و دل میں اب پایا نہیں جاتا

حرارت عشق کی ڈوبی سلاسل کی صداؤں میں

زباں پر گرمی لب کیا ہے بتلایا نہیں جاتا

کبھی ہم ساتھ رہتے تھے کبھی ناراض ہو جاتے

نہ جانے ذہن سے کیوں پیار کا سایا نہیں جاتا

عجب سی ایک الجھن ہے عیاں کرنا بھی مشکل ہے

حقارت کا نوالا ہم سے تو کھایا نہیں جاتا

بدن میں آگ ہے ماہرؔ نہ ٹھنڈک کوئی باتوں میں

نگاہوں سے کوئی دل آج گرمایا نہیں جاتا