har ek lamha mujhe Thahra hua mahsus hota hai

har ik lamha mujhe Thahrā huā mahsūs hotā hai

mujhe saarā jahāñ ik ratjagā mahsūs hotā hai

sunā.ī kuchh nahīñ detā dikhā.ī kuchh nahīñ detā

magar chāroñ taraf ik jamghaTā mahsūs hotā hai

tirā hī naam letā huuñ to phir mujh ko vajūd apnā

havāoñ par likhā harf-e-duā mahsūs hotā hai

mirī palkoñ pe shabnam gir rahī hai niiñd kī lekin

mujhe har ek saaya jāgtā mahsūs hotā hai

hazāroñ saal pahle kī shanāsā.ī nahīñ bhūlā

mujhe har aadmī dekhā huā mahsūs hotā hai

mujhe apnā hī qad lagtā hai kyuuñ ūñchā pahāḌoñ se

mujhe apnā ye saaya kyuuñ baḌā mahsūs hotā hai

na jaane kaun sī manzil pe aa Thahrā huuñ maiñ 'anjum'

jahāñ har ek sannāTā sadā mahsūs hotā hai

har ek lamha mujhe Thahra hua mahsus hota hai

mujhe sara jahan ek ratjaga mahsus hota hai

sunai kuchh nahin deta dikhai kuchh nahin deta

magar chaaron taraf ek jamghaTa mahsus hota hai

tera hi nam leta hun to phir mujh ko wajud apna

hawaon par likha harf-e-dua mahsus hota hai

meri palkon pe shabnam gir rahi hai nind ki lekin

mujhe har ek saya jagta mahsus hota hai

hazaron sal pahle ki shanasai nahin bhula

mujhe har aadmi dekha hua mahsus hota hai

mujhe apna hi qad lagta hai kyun uncha pahaDon se

mujhe apna ye saya kyun baDa mahsus hota hai

na jaane kaun si manzil pe aa Thahra hun main 'anjum'

jahan har ek sannaTa sada mahsus hota hai