ہر اک لمحہ نیا اک سانحہ ہے

ہر اک لمحہ نیا اک سانحہ ہے

الٰہی زندگی ہے یا سزا ہے

وہ دیوانہ جو گرویدہ تھا کل تک

ترے کوچے سے دل برداشتہ ہے

نہیں ممنون کوئی بھی کسی کا

جسے دیکھو وہی خود ساختہ ہے

یہاں سب کو پڑی ہے اپنی اپنی

کہو کیا روز محشر آ گیا ہے

نہیں پہچانتا کوئی کسی کو

فقط اک دوسرے کو دیکھتا ہے

ہوائے گرم ہر سو چل رہی ہے

نگر دل کا بہت سنسان سا ہے

کنارے دور ہوتے جا رہے ہیں

سفینہ کون سی جانب چلا ہے

بہت مسرور ہے شارقؔ جہاں میں

تری الفت نے جانے کیا دیا ہے