har ek manzil har ek sahil har ek tufan se Takrai

har ik manzil har ik sāhil har ik tūfāñ se Takrā.ī

mirī vahshat ġharaz kul ālam-e-imkāñ se Takrā.ī

yakāyak rah ga.ī duniyā-e-armāñ sar-nigūñ ho kar

nigāh-e-be-kasāñ jab bhī ruḳh-e-tābāñ se Takrā.ī

hañsī aa hī ga.ī us dam mujhe jabr-e-mashiyyat par

kabhī jab talḳhī-e-ġhurbat mire vijdāñ se Takrā.ī

yakāyak rah ga.ī duniyā-e-armāñ sar-nigūñ ho kar

nigāh-e-be-kasāñ jab bhī ruḳh-e-tābāñ se Takrā.ī

rahā kotāh-dāmānī kā shikva sar-ba-sar mujh ko

tirī nazar-e-karam jab vus.at-e-armāñ se Takrā.ī

ta.ajjub hī rahā ġham-ḳhvāriyoñ ko saḳht-jānī par

mirī īzā-pasandī jab ġham-e-darmāñ se Takrā.ī

ham us dam ḳhairiyat pūchheñge vaa.iz se ki jab koī

nigāh-e-kufr-sāmāñ ḳhirman-e-īmāñ se Takrā.ī

rahī 'sāhir' hamesha bandagī meñ shān-e-yazdānī

maiñ vo banda huuñ jis kī bandagī yazdāñ se Takrā.ī

har ek manzil har ek sahil har ek tufan se Takrai

meri wahshat gharaz kul aalam-e-imkan se Takrai

yakayak rah gai duniya-e-arman sar-nigun ho kar

nigah-e-be-kasan jab bhi ruKH-e-taban se Takrai

hansi aa hi gai us dam mujhe jabr-e-mashiyyat par

kabhi jab talKHi-e-ghurbat mere wijdan se Takrai

yakayak rah gai duniya-e-arman sar-nigun ho kar

nigah-e-be-kasan jab bhi ruKH-e-taban se Takrai

raha kotah-damani ka shikwa sar-ba-sar mujh ko

teri nazar-e-karam jab wusat-e-arman se Takrai

tajjub hi raha gham-KHwariyon ko saKHt-jaani par

meri iza-pasandi jab gham-e-darman se Takrai

hum us dam KHairiyat puchhenge waiz se ki jab koi

nigah-e-kufr-saman KHirman-e-iman se Takrai

rahi 'sahir' hamesha bandagi mein shan-e-yazdani

main wo banda hun jis ki bandagi yazdan se Takrai