har ek manzil qayam-e-rahguzar malum hoti hai

har ik manzil qayām-e-rahguzar ma.alūm hotī hai

hameñ to zindagī paiham safar ma.alūm hotī hai

vahī tanhā.ī kā aalam vahī be-raunaqī har sū

bayābāñ terī ḳhāmoshī bhī ghar ma.alūm hotī hai

hamāre hāsidoñ kī chaal āḳhir rañg le aa.ī

bahut badlī huī un kī nazar ma.alūm hotī hai

masīhā bhuul jā terī davā kuchh kaam aa.egī

ki har tadbīr ab to be-asar ma.alūm hotī hai

agar do vaqt kī roTī hī mil jaa.e ġhanīmat hai

miyāñ faaqe meñ guThlī bhī samar ma.alūm hotī hai

añdherī raat meñ ai jān-e-jāñ bhaTke musāfir ko

diye kī lau bhī jaise ik qamar ma.alūm hotī hai

har ek manzil qayam-e-rahguzar malum hoti hai

hamein to zindagi paiham safar malum hoti hai

wahi tanhai ka aalam wahi be-raunaqi har su

bayaban teri KHamoshi bhi ghar malum hoti hai

hamare hasidon ki chaal aaKHir rang le aai

bahut badli hui un ki nazar malum hoti hai

masiha bhul ja teri dawa kuchh kaam aaegi

ki har tadbir ab to be-asar malum hoti hai

agar do waqt ki roTi hi mil jae ghanimat hai

miyan faqe mein guThli bhi samar malum hoti hai

andheri raat mein ai jaan-e-jaan bhaTke musafir ko

diye ki lau bhi jaise ek qamar malum hoti hai